патот на душата

Секој од нас е повеќе од она што мисли дека е. Зад нашето секојдневно “Jас” постои едно многу поголемо, подлабоко и посветло битие, постои нашата Душа.

Таа е нашата вистинска матична држава, додека човекот е нејзината амбасада во материјалниот свет. Повеќето од нас живеат како да се одвоени, заборавајќи кој ги испратил тука и зошто. Но кога ќе се воспостави свесниот контактот со душата, се добива смисла.

“Патот на Душата” е пат на будење, на сеќавање дека не сме само ум и тело, туку и нешто многу поголемо, нешто многу позначајно.

Тоа е внатрешно патување од состојба на страв и егоцентрични желби, кон состојба на љубов, мир и соединување со сопствената суштина. Тоа е процес во кој ние еволуираме и преку секоја животна препрека добиваме можност за издигнување.

Овој вебсајт и целото мое обраќање, се посветени токму на тоа. Да се осветли овој пат, да се поддржи твојата желба за духовна зрелост и да се помогне да ја пронајдеш таа внатрешна поврзаност што веќе постои, но можеби е заборавена.

Ќе зборуваме за:

- Душата: Кој сме ние во неа, но и таа во нас?
- Свесност: Што е тоа Свесност и кој е свесниот дел во нас?
- Емоции: Како настануваат и што сакаат да ни кажат?
- Духовна мапа: Како изгледа нашата внатрешна еволуција?
- Бог и Универзумот: Каква е нивната поврзаност со нас?

Ќе зборуваме и за препреките бидејќи секој духовен раст вклучува и болка, кризи, загуби и искушенија. Но тие не се тука за да не скршат, туку да не изградат, да не трансформираат во подобра верзија на себеси.

Верзија на “Јас” која ќе поседува своја автентична индивидуалност, но пропратена со одредени квалитети на личноста, како следниве:

- Висока свесност
- Емоционална зрелост
- Отворено духовно срце
- Смиреност
- Понизност
- Љубов
- Благодарност

Овој пат воопшто не е лесен, но е длабоко благороден и секој од нас веќе оди по него.

Прашањето е:
Дали си подготвен да почнеш да го одиш свесно?